Per lo desvolopament d'ua fòrça politica occitanista navèra

De
Publié par

Per lo desvolopament d'ua fòrça politica occitanista navèra. Lo movement occitanista qu'a tostemps trantalhat enter çò qui's defeneish com ua accion culturau ...

Publié le : lundi 16 avril 2012
Lecture(s) : 12
Nombre de pages : 4
Voir plus Voir moins
Per lo desvolopament d'ua
fòrça politica occitanista navèra
Lo movement occitanista qu'a tostemps trantalhat enter çò qui's defeneish com ua accion culturau
d'un costat e çò qui's defeneish com ua accion politica de l'aute.
Que sabem plan las duas causas que son ligadas. L'occitanisme, qui a per basa prumèra la
promocion de la lenga e de la cultura occitanas, sap que
la question lingüistica ei ua question
hòrt politica, sustot en França.
Personalitats importantas de l'occitanisme, personalitats qui an trabalhat dab e per la lenga, qu'an
sovent dit la necessitat d'aver ua influéncia sus la decision politica.
Aquera necessitat que hasó espelir per las annadas 70 e 80 organizacions politicas occitanistas a
costat d'ua mavença associativa culturau.
Dempuish, lo temps qu'a passat e l'occitanisme qu'a contunhat de víver enter accion politica e
accion culturau quitament se sabèva que, de còps que i avèva, miava accions qui èran ua mescla
d'accion politica e d'accion culturau. En realitat qu'èran globalament accions de hemnas e d'òmis
engatjats dens la definicion de çò que deu estar lo monde de doman dab una vision occitana e
occitanista.
Aqueth movement occitanista culturau o politic, sovent entermesclat, qu'a contunhat de portar per
las annadas passadas un messatge cap a la societat e cap a las institucions.
Lo resultat qu'ei positiu mes pas satisfasent enqüèra.
Aqueth movement qu'a permetut de sortir la question de la lenga deu silenci politic general.
Aquesta lenga, qui ei l'element qui hè l'identitat de basa deu país d'òc, qu'ei en perilh. Mes
l'occitanisme dens la soa globalitat qu'ei arribat a tornar méter en causa l'ida qu'èra dens la logica,
dens lo sens de l'istòria, que la lenga podosse desaparéisher. Aquesta remesa en causa qu'ei un
eveniment politic creat per un movement associatiu majoritariament qualificat de culturau.
Los « culturaus » e los « politics » ? E i a un dialògue impossible ?
Dempuish las annadas 80 progrès qu'ei estat hèit dens l'estructuracion de l'ensenhament de la
lenga, puish qu'ei vienguda la professionalizacion d'ua partida deu movement culturau e un
desvolopament important de la creacion artistica.
Dempuish 2005, logicament en seguida d'aqueras evolucions, de granas mobilizacions en
favor de la lenga e de la soa reconeishença qu'an provat que i avèva un movement popular
qui vòu defénder la soa identitat culturau e lingüistica.
Tot l'occitanisme que i a sentit ua
legitimacion de la soa accion. Qu'èra lo resultat deu tribalh d'ua generacion.
Las organizacions politicas occitanistas que portèn la lor pèira a tot aquò. Qu'observèn, parlèn,
prepausèn causas dens lo domèni politic en tribalhar sus las questions de descentralizacion, en
har véder qu'èra logic de ligar las questions politicas, sociaus e economicas dab las questions
culturaus e lingüisticas. Entà
har víver la lenga e la cultura que cau lo territòri occitan que
demore viu dab hemnas e òmis que i tribalhan.
Vertat ei, uns occitanistas non compregón pas tostemps que d'autes se presentèssen a eleccions
o entrèssen dens l'accion politica. Au cap d'un moment los qui hasèvan
politica qu'èran un pauc
amars de véder que los « culturaus » no's volèvan pas implicar dens çò politic. Totun, aqueth
amarum n'èra pas justificat pr'amor har accion culturau qu'ei har accion politica.
Vertat ei, qu'arribè que los occitanistas « culturals »
avossin un pauc de mauhisança cap aus
occitanistas «
politics » per paur, benlhèu, de's comprométer. Aquesta dificultat de l'ua e l'auta
branca de l'occitanisme a's rencontrar se pòt explicar peu hèit qu'èm
tots estats mei o mensh
formatats a pensar que las solas organizacions politicas qui valen son las qui son dirigidas
de París estant e qui son organizadas exagonalament. Deu costat deus « politics » ua
tendéncia a non pas préner la question lingüistica com un element mobilizator màger pòt
explicar tanben aquera dificultat de comunicacion.
Quin deu cambiar l'occitanisme ?
Que devem adara mesurar los cambiaments qui son intervenguts dens la nosta societat pendent
lo temps que los nostes movements se botavan en plaça. Lo monde tanben qu'a cambiat. Las
regions en França qu'an mei d'existéncia que per las annadas 70, l'Euròpa s'ei estructurada, las
comunicacions an cambiat, suu territòri occitan e suu planeta en generau.
L'occitanisme culturau e l'occitanisme politic qu'an hèit lo camin d'anar cap a las autas regions e
aus autes pòbles de l'exagòne. Aquò tanben qu'ei nau.
L'occitanisme que deu cambiar ; qu'ac senteish, qu'ac pressenteish ; mes que cèrca de
quin biais aquò se harà.
L'occitanisme qu'a de préner en compte l'ambicion navèra de quauques collectivitats a préner mei
de responsabilitats e a assumir mei de competéncias fàcia a un Estat qui a la volontat permanenta
de tornar centralizar e de tornar préner las competéncias qui avèva abandonat. La refòrma en
cors pertocant las collectivitats qu'ei ua illustracion d'aquò. Qu'ei ua refòrma qui hè pesar un perilh
mortau sus las timidas politicas lingüisticas entamenadas dens las regions per exemple. Que hè
pesar tanben un perilh sus la vita deus nostes territòris.
Uns occitanistas qu'an causit de's presentar sus listas a las eleccions regionaus de 2010. Las
condicions politicas qu'èran optimaus entà aquò har.
Cinc conselhèrs regionaus occitanistas qu'estón elegits a las eleccions de març de 2010 sus las
listas Europe Ecologie. Los cinc que son sòcis deu Partit Occitan e donc de la federacion Regions
e Pòbles Solidaris. Qu'an començat de tribalhar.
Lo projècte occitanista : politic o culturau ?
Per aquesta rason que lançam ua crida a
la refondacion deu movement
occitanista dab un
ahortiment de la soa capacitat d'intervencion dens lo domeni politic.
Lo biais de har politica, de s'engatjar dens la vita publica, qu'a cambiat e que cambiarà enqüèra
per las annadas qui vienen.
Los partits que deven préner en compte aqueths cambiaments. Lo Partit Occitan tanben, solide.
Qu'ei çò qui ve prepausam.
L'engatjament deus ciutadans que's hè d'ara enlà sus projèctes. Òm entra pas mei dens un
partit com dens ua glèisa.
L'occitanisme qu'ei segurament portaire d'un projècte politic peu sègle qui vien de començar.
Solide, lo movement ecologista politic exagonau qu'a tribalhat en collaboracion dab los
occitanistas. L'un qu'avó besonh l'aute e l'aute qu'avó besonh l'un. Que
sembla totun que
l'existéncia d'ua formacion politica occitanista autonòma
e capabla de har alianças
(electoraus segur, mes mei qu'aquò) s'ac pensa utile ei absoludament necessària se volem que
las nostas ideas sian presas en compte.
Har alianças lhèu mes a quin prètz ? Pas en abandonar las nostas
conviccions pregondas.
Lo movement occitanista qu'ei estat plan permeable a las ideas de l'ecologia politica e sovent
l'occitanisme estó en punta dens los combats qualificats d'ecologistas.
Totun los qui gabidan lo
movement ecologista en França n'an pas enqüèra pro pres en compte la reivindicacion
occitanista
e segurament n'an pas pres la mesura de la portada politica de la reivindicacion
lingüistica e de la necessitat d'aplicar lo federalisme dens l'encastre de l'Estat francés. Quauques
sectors de l'ecologia politica que s'afirman federalistas mes non son pas majoritaris. Qu'avem
tanben a defénder l'idea que lo combat qui miam ei a la pagèra de l'Euròpa. Uns aliats nostes
prenen aquò en compte mes pas tostemps e pas pro. Qu'avem a har progressar l'idea que no's
pòt pas concéber ua defensa de la diversitat biologica sens promòver la diversitat lingüistica e
culturau.
Donc entà har audir la votz de l'occitanisme que cau que i aja ua dinamica pròpia qui aurà
la capacitat de portar las nòstas reivindicacions.
Quin serà estructurada aquera dinamica ? Qu'ei d'aquò qui cau parlar tots amassas.
Que vòu díser que devem poder har ua mudason shens arrenegar la nosta istòria, l'istòria de
l'occitanisme, mes shens ne har un objècte sacrat. Que devem tanben compréner que las
estructuras existentas, los noms qui pòrtan tanben que son estats apèrs, aisinas entà'ns miar on
èm.
Donc, ne'ns devem
pas deishar enganar per un culte de las estructuras o per un
patriotisme associatiu o partidista.
La modernizacion de l'occitanisme qu'ei, qu'ac credem, ua necessitat absoluda.
Una
generacion navèra espèra quauquarren. Que devem préner en compte la soa cultura politica, lo
son biais de véder e de compréner l'engatjament e la soa faiçon de concéber l'intervencion deus
òmis e de las hemnas sus l'anar de la societat.
Que'vs convidam a participar a ua amassada ubèrta a tots. Aquera amassada que's harà prumèr
au nivèu de las regions entà s'acabar per una amassada panoccitana.
Per tot lo sud de la Gasconha que ns'amassaram lo divés 10 de junh a Pau a 20h30 au Complèxe
de la Republica
Que v'esperam nombrós per ua discussion ubèrta a tots e a totas las tendéncias de l'occitanisme
e au delà
David Grosclaude
Guilhèm Latrubesse
David Grosclaude
Guilhèm Latrubesse
Envit a ua amasssada de reflexion sus l'aviéner de
l'occitanisme
Amiga
Amic
Que'ns permetem de v'invitar a ua amassada qui's debanarà
lo
divés 10 de junh a 20h 30 au Complèxe de la Republica a Pau.
Que trobaratz ací un tèxte qui vòu servir de basa au noste debat.
Que prepausam ua reflexion sus l'accion e l'estructuracion de
l'occitanisme, a noste e pertot en país occitan.
Que siatz en acòrd dab la nosta analisi, interessats entà har un tròç
de camin dens la reflexion, critics dab l'accion passada, en
desacòrd dab la nosta vision de la situacion, que seratz
planvienguts entà devisar e escambiar las ideas.
Amassadas com aquesta que seràn organizadas per las
setmanas qui vienen pertot dens las regions occitanas entà
poder arribar abans la fin de l'annada a ua amassada qui harà
ua sintèsi e qui prepausarà ua seguida concreta.
Mercés de l'atencion que portaratz a la nosta iniciativa ; en ve
pregar de créder a las nostas salutacions occitanistas.
David Grosclaude
Guilhèm Latrubesse
Soyez le premier à déposer un commentaire !

17/1000 caractères maximum.

Diffusez cette publication

Vous aimerez aussi